ആലുവ: ബിഗ് ബോസ് ആറാം സീസണിൽ കിരീടം നേടിയ പി.ഡി. ജിന്റോയുടെ ഹെൽത്ത് ക്ലബ് ജപ്തി ചെയ്ത് ഉപകരണങ്ങൾ ലേലം ചെയ്തു. 16 ലക്ഷത്തോളം രൂപയുടെ വാടക കുടിശികയെത്തുടർന്നാണ് ഹെൽത്ത് ക്ലബ് നഗരസഭ ലേലം ചെയ്തത്.
ആലുവ സ്വകാര്യ ബസ്സ്റ്റാൻഡിനു പിൻവശം നഗരസഭയുടെ ക്ലോക്ക് ടവർ കെട്ടിടത്തിന് ഏറ്റവും മുകളിൽ പ്രവർത്തിച്ചിരുന്ന ‘ബോഡി ക്രാഫ്റ്റ് മൾട്ടി ഇന്റർനാഷണൽ’ ഹെൽത്ത് ക്ലബ്ബിലെ ഉപകരണങ്ങൾ ലേലം ചെയ്തതിൽ 6.15 ലക്ഷം രൂപയാണു ലഭിച്ചത്. പത്തു ലക്ഷത്തോളം രൂപ നഗരസഭയ്ക്ക് നഷ്ടം വന്നു.
6.14 ലക്ഷം രൂപയാണ് ചുരുങ്ങിയ ലേലത്തുകയായി നിശ്ചയിച്ചിരുന്നത്. ഫോർട്ടുകൊച്ചിയിൽ ജിം നടത്തുന്നയാളാണു ലേലം വിളിച്ചെടുത്തത്.
2017ലാണ് 2000 ചതുരശ്ര അടി വിസ്തീർണത്തിൽ ജിന്റോ ജിം ആരംഭിച്ചത്. 2021ന് ശേഷം നഗരസഭയിൽ വാടക അടച്ചിട്ടില്ല. മൂന്നു മാസം മുമ്പ് നോട്ടീസ് നൽകി മുറി നഗരസഭ സീൽ ചെയ്തു. തുടർന്നാണ് ലേലനടപടികൾ പൂർത്തിയാക്കിയത്.
ആലുവയിൽ വാടകക്കുടിശിക നിലനിൽക്കേ സെലിബ്രിറ്റി ഫിറ്റ്നസ് ട്രെയിനർ എന്ന നിലയിൽ മറ്റു സ്ഥലങ്ങളിൽക്കൂടി ഇയാൾ ബ്രാഞ്ചുകൾ തുടങ്ങിയിരുന്നു. സിനിമാ മേഖലയിലുള്ള ചില യുവതികളെയും യുവാക്കളെയും ഇയാൾ പരിശീലിപ്പിച്ചിരുന്നു.